ენსელ ელგორტი (დ. 14 მარტი, 1994) — ამერიკელი მსახიობი, მომღერალი და დიჯეი (სახელწოდებით Ansølo). ელგორტი დაიბადა ნიუ-იორკში, ფოტოგრაფ არტურ ელგორტისა და ოპერის რეჟისორ გრეტ ბარეტ ჰოლბის ოჯახში. ჰყავს ძმა უორენი და და სოფი. ელგორტის, როგორც მსახიობის კარიერა 2013 წელს დაიწყო. მისი სადებიუტო ფილმი იყო „Carrie“, სტივენ კინგის წიგნის რიგით მესამე კინოადაპტაციაში ელგორტმა ითამაშა ტომი როსის მეორეხარისხოვანი როლი. გადასაღებ მოედანზე მისი კოლეგები იყვნენ ქლოი გრეის მორეცი და ჯულიანა მური. ფილმის მსოფლიო პრემიერა შედგა 2013 წლის ოქტომბერში. მისი რიგით მეორე ფილმი იყო „დივერგენტი“ (2014), სადაც ენსელმა ითამაშა კალებ პრიორის ბეატრისის ძმის (მთავარ როლს შაილენ ვუდლი ასრულებს) როლი. 2014 წელს ელგორტმა ითამაშა მამაკაცის მთავარი როლი ფილმში „ბედის ვარსკვლავის ბრალია“, რომელშიც მას პარტნიორობა კვლავ შაილენ ვუდლიმ გაუწია. ფილმი დაფუძნებულია ჯონ გრინის იგივე სახელწოდების წიგნზე. 2014 წელს ელგორტმა ითამაშა ასევე ტიმ მუნის როლი ფილმში „მამაკაცები, ქალები და ბავშვები“. 2015 წლის 19 მარტს შედგა ფილმის „დივერგენტი, თავი 2: ინსურგენტი“ პრემიერა. მსახიობმა ასევე ითამაშა „Baby Drive“-სა და „The Billionaires Club“-ში, რომლებიც მსოფლიომ იხილა, 2017 და 2018 წლებში. 2018 წლის ოქტომბერში ცნობილი გახდა, რომ ენსელ ელგორტი შეასრულებს მთავარ როლს ფილმში, რომელსაც საფუძვლად უდევს ბროდვეის მიუზიკლი „West Side Story“. ფილმის რეჟისორი იქნებოდა სტივენ სპილბერგი და გადაღებები დაიწყებოდა 2019 წლის გაზაფხულზე. 2019 წლის სექტემბერში ეკრანზე გამოვიდა ფილმი „ჩიტბატონა“ დონა ტარტის რომანის მიხედვით, სადაც ენსელ ელგორტი მთავარ როლს ასრულებს. 2012 წელს ელგორტმა რომანი გააბა ბალერინა ვაიოლეტ კომიშანთან, რომელსაც ის სკოლაში სწავლის პერიოდში შეხვდა. ისინი დაშორდნენ 2014 წლის აგვისტოში, მაგრამ 2015 წლის იანვარში აღადგინეს ურთიერთობა წყარო: ka.wikipedia.org